عرب امارات کا فوری جنگ بندی اور دو ریاستی حل کا کھوکھلا مطالبہ

نیویارک : اسرائیل کے گہرے دوست متحدہ عرب امارات نے غزہ اور مغربی کنارے میں اسرائیلی فوجی کارروائیوں کو مسترد کرتے ہوئے فوری جنگ بندی، محاصرہ ختم کرنے اور دو ریاستی حل پر زور دیا ہے۔ اماراتی وزیر مملکت لانا نصیبہ نے گذشتہ روز جنرل اسمبلی سے زبانی جمع خرچ کرتے ہوئے کہا کہ شہریوں کو نشانہ بنانا، بھوکا رکھنا، جبری بے دخلی اور توسیع پسندانہ عزائم کسی صورت قابلِ قبول نہیں۔ انہوں نے دو ریاستی حل کو فلسطین اسرائیل تنازع کے مستقل اور منصفانہ حل کے لیے بنیادی شرط قرار دیا اور مشرقی یروشلم کو فلسطین کا دارالحکومت بنانے پرزور دیا۔ نصیبہ نے فلسطین کو تسلیم کرنے کے حالیہ عالمی فیصلوں کا خیرمقدم کیا اور دیگر ممالک سے بھی ایسا ہی کرنے کی اپیل کی۔ ساتھ ہی انہوں نے مطالبہ کیا کہ یرغمالیوں اور قیدیوں کی رہائی کے ساتھ ساتھ انسانی امداد کی فوری اور بلاروک ٹوک ترسیل یقینی بنائی جائے۔