صیہونی فوج کا جبالیہ کیمپ پر امریکی بموں سے حملہ، درجنوں شہید و زخمی، مجموعی تعداد 8 ہزار 500 سے تجاوز

غزہ: صیہونی فوج کے جبالیہ پناہ گزین کیمپ پر حملے میں 50 فلسطینی شہید اور درجنوں زخمی ہوگئے۔ صیہونی جنگی طیاروں نے جبالیہ کیمپ کے پرہجوم علاقے کی دو بڑی عمارتوں کو نشانہ بنایا۔ انتہائی طاقتور امریکی بموں نے پورے پناہ گزین کیمپ کو صفحہ ہستی سے مٹادیا۔ درجنوں افراد ملبے تلے دب گئے۔ امدادی کارکنوں اور مقامی افراد نے ابتدائی طور پر پچاس سے زائد لاشوں کو نکال کر اسپتال منتقل کیا جبکہ خواتین اور بچوں سمیت کئی زخمیوں کو بھی اسپتال پہنچایا۔ اسرائیلی فوج نے جبالیہ میں حماس کے سینٹرل جبالیہ بٹالین کے کمانڈر ابراہیم بیاری کو فضائی حملے میں شہید کرنے کا دعویٰ کیا ہے۔
اُدھر صیہونی فوج نے صبح سویرے خان یونس پر بم برسائے جس کے نتیجے میں سولہ افراد شہید اور کئی زخمی ہوئے۔ اسرائیلی فوج نے شمالی غزہ میں حماس کے ساتھ لڑائی میں مزید 9 فوجی ہلاک ہونے کی تصدیق کی ہے۔ غزہ کی پٹی میں 7 اکتوبر سے جاری اسرائیلی حملوں سے شہید ہونے والے فلسطینیوں کی تعداد 8 ہزار 525 تک پہنچ گئی ہے۔ جس میں 3 ہزار 542 بچے جبکہ 2 ہزار 187 خواتین شامل ہیں جبکہ ساڑھے 21 ہزار افراد زخمی ہیں۔