حماس کی تباہی تک غزہ میں جنگ نہیں رکے گی، اسرائیلی وزرا کی دھمکیاں

تل ابیب : اسرائیلی وزیر دفاع اسرائیل کاٹز اور قومی سلامتی کے وزیر ایتمار بین گویر نے دھمکی دی ہے کہ غزہ پر جنگ اس وقت تک نہیں رکے گی جب تک تمام مقاصد حاصل نہیں ہو جاتے۔ اسرائیل کاٹز نے سوشل میڈیا پلیٹ فارم ایکس پر ایک پوسٹ میں کہا کہ فوج غزہ پر اپنے حملوں کو بڑھا رہی ہے اور فیصلہ کن مرحلے کی طرف بڑھ رہی ہے۔ انہوں نے مزید کہا کہ حماس کی دھمکیوں کے باوجود غزہ شہر سے جنوب کی طرف ساڑھے سات لاکھ سے زیادہ افراد نقل مکانی کر گئے ہیں اور یہ سلسلہ ابھی جاری ہے۔ انہوں نے مزید کہا کہ فوجی غزہ شہر میں زیادہ سے زیادہ محلوں اور علاقوں کو پر کنٹرول حاصل کر رہی ہے۔ اگر حماس نے تمام قیدیوں کو رہا نہیں کیا اور اپنے ہتھیار حوالے نہیں کیے تو غزہ تباہ ہو جائے گا اور تحریک حماس کا بھی خاتمہ ہو جائے گا۔
ادھر قومی سلامتی کے وزیر ایتمار بین گویر نے نیتن یاہو کو مخاطب کرتے ہوئے ایکس پر لکھا کہ آپ کے پاس حماس کو مکمل طور پر شکست دیے بغیر جنگ ختم کرنے کا مینڈیٹ نہیں ہے۔
اسرائیلی وزیر خارجہ گیڈون ساعر نے ایکس پر لکھا کہ دو سال کی جنگ کے بعد یہ واضح ہے کہ اسرائیل کا قومی مفاد جنگ کو ختم کرنا اور اپنے مقاصد حاصل کرنا ہے۔