امریکا اور اس کے اتحادی لبنان میں حکومت کی تشکیل نہیں چاہتے، حزب اللہ

بیروت : حزب اللہ نے کہا ہے کہ امریکا اور اس کے اتحادی لبنان میں حکومت کی تشکیل اور اسے امن کی طرف گامزن نہیں دیکھنا چاہتے۔ حزب اللہ کے 40 ویں یوم تاسیس کی مناسبت سے منعقدہ تقریب سے خطاب میں ڈپٹی سیکریٹری جنرل شیخ نعیم قاسم نے کہا کہ نئی کابینہ کی تشکیل ایک نئے مرحلے کا آغاز ہے اور اگر حکومت تشکیل دی جائے تو ارکان پارلیمنٹ حکومت سے مختلف مسائل کے متعلق وضاحت طلب کر سکتے ہیں تاہم اگر حکومت تشکیل نہ دی گئی تو پارلیمنٹ میں کسی کو بھی دوسرے فریق کے مواخذے کا حق نہیں ہے۔شیخ نعیم قاسم کا کہنا تھا کہ ان دنوں لبنان کے حالات غیر معمولی ہیں اور کمترین شرائط پر حکومت تشکیل دینی ہوگی، اگرچہ شرائط کی پیچیدگی بعض فریقوں کے مفاد میں ہیں تاہم حکومت کی تشکیل ناگزیر ہے۔ ہمیں آخری لمحے تک کوشش کرنا ہوگی اور ہم جانتے ہیں کہ امریکا اور اس کے اتحادی لبنان میں حکومت کے تشکیل نہیں چاہتے اور ہمارے ملک کو نا امنی کی جانب دھکیلنا جاہتے ہیں لیکن ہمیں ملک کے اندر جرأتمندانہ فیصلے اور اقدامات کرنے ہوں گے تاکہ ملک حکومت کے بغیر نہ چلے۔