اقوام متحدہ غزہ میں بحالی کیلئے مکمل تعاون کرے گی، گوتریس

نیویارک: اقوام متحدہ کے سربراہ انتونیو گوتریس نے کہا ہےکہ دنیا اس لمحے کی طویل عرصے سے منتظر تھی اور تمام فریقوں سے اپیل کی کہ وہ اس موقع کو سنجیدگی اور تعمیری انداز میں استعمال کریں۔ انتونیو گوتریس نے نیوز کانفرنس میں کہا کہ جنگ بندی کا یہ معاہدہ امریکی صدر ڈونلڈ ٹرمپ کے پیش کردہ امن منصوبے پر مبنی ہے، اور اقوام متحدہ مکمل تعاون کے لیے تیار ہے۔ انہوں نے کہا کہ اقوام متحدہ کے پاس فوری عمل کے لیے تجربہ، تقسیم کے نیٹ ورک، اور زمینی سطح پر کمیونٹی روابط موجود ہیں۔ گوتریس کے مطابق اقوام متحدہ کی ٹیمیں الرٹ ہیں اور خوراک، پانی، صحت اور پناہ گاہوں کی فراہمی فوری طور پر بڑھائی جا سکتی ہے۔ انہوں نے کہا کہ پائیدار امن صرف ہتھیاروں کے خاموش ہونے سے ممکن نہیں، بلکہ اس کے لیے انسانی ہمدردی کی رسائی کو مکمل، محفوظ اور مسلسل ہونا ضروری ہے۔ اس کے ساتھ ساتھ غزہ میں تباہ شدہ بنیادی ڈھانچے کی بحالی اور تمام رکاوٹوں کے خاتمے پر زور دیا۔