ترک فوج عراق چھوڑ دے، پورا ملک غصے میں ہے، وزیر خارجہ

بغداد : عراق کے وزیر خارجہ نے ترکی کو عراقی سرزمین چھوڑنے کے لئے ایک قرارداد جاری کرنے کی درخواست کرتے ہوئے کہا کہ شمال سے جنوب تک سارا عراق ترک جارحیت پر غصے میں ہے۔ عراقی وزیر خارجہ فواد حسین نے اعلان کیا ہے کہ بغداد سلامتی کونسل سے ایک قرارداد جاری کرنے کا مطالبہ کرتا ہے کہ جس میں ترکی کی افواج کو عراقی سرزمین سے انخلاء کے لئے مجبور کیا جائے۔ انہوں نے سلامتی کونسل کے اجلاس سے خطاب کرتے ہوئے کہا کہ عراق کی حکومت کوشش کر رہی ہے کہ خطے میں جاری بحران کے حل کے لئے مثبت کردار ادا کرے۔ ترکی، عراق کے شہر دھوک میں اپنے میزائل حملے سے متاثرہ خاندانوں کو معاوضہ ادا کرے۔ عراق کے وزیر خارجہ نے جارحیت کی تحقیقات کے لئے ایک آزاد اور خود مختار کمیشن بنانے کا مطالبہ کیا ہے۔ فواد حسین نے تاکید کے ساتھ کہا کہ عراق اپنے داخلی مسائل میں ترکی کے انداز کو مسترد کرتا ہے۔ انہوں نے مزید کہا کہ ترکی کی جارحیت کی وجہ سے جنوب سے شمال تک سارے عراق کے عوام میں غم و غصے کی لہر دوڑ گئی ہے۔ عراق کے وزیر خارجہ نے کہا کہ ہم ترک فوج کو پے در پے جارحانہ رویے کے نتیجے میں صورت حال خراب ہونے سے خبردار کرتے ہیں۔