Raza Musani 
کابل: طالبان حکومت نے سویڈن میں توہین قرآن کے خلاف افغانستان میں سویڈن کی تمام سرگرمیاں معطل کردیں۔ طالبان ترجمان ذبیح اللہ مجاہد نے ایک بیان میں کہا ہے کہ حکومت نے سویڈن کی افغانستان میں تمام سرگرمیاں کو روکنے کا حکم دے دیا ہے۔ یہ فیصلہ سویڈن میں قرآن کی توہین اور مسلمانوں کے عقائد کی توہین کی اجازت دینے کے ردعمل میں کیا ہے۔ ترجمان نے کہا توہین قرآن اور مسلمانوں کے عقائد کی توہین کرنے پر سرکاری سطح پر معافی مانگنے تک سویڈن کی تمام سرگرمیاں افغانستان میں معطل رہیں گی۔ اگست 2021 میں طالبان کے کابل میں اقتدار سنبھالنے کے بعد سے سویڈن کا افغانستان میں سفارت خانہ کھلا نہیں ہے۔تاہم اس حکم نامے سے سویڈن کی غیر سرکاری تنظیم سویڈش کمیٹی برائے افغانستان کے متاثر ہونے کا امکان ہے۔ جس کے ملک بھر میں صحت، تعلیم اور دیہی ترقی میں ہزاروں امدادی کارکن کام کر رہے ہیں۔
