بچوں کی شہادت نے اسرائیلی خلاف ورزیوں کی سنگینی بےنقاب کردی، حماس

غزہ : حماس کے ترجمان حازم قاسم نے اسرائیلی ڈرون حملے میں دو فلسطینی بچوں کی شہادت پر شدید ردعمل میں کہاہےکہ اس واقعے نے ایک بار پھر اسرائیلی خلاف ورزیوں کی سنگینی کو بے نقاب کر دیا ہے۔
حازم قاسم نے ایک بیان میں کہا کہ جنگ بندی کے بعد بھی جارحیت رک نہ سکی، صرف اس کی شدت میں کمی آئی ہے۔ انہوں نے کہا کہ یہ حملہ اس حقیقت کی تصدیق ہے کہ غزہ کے عوام کے خلاف نسل کشی پر مبنی جنگ اب بھی پوری طاقت سے جاری ہے۔ ترجمان نے جنگ بندی کی نگرانی کرنے والے تمام فریقوں، خصوصاً ثالث ممالک اور شرم الشیخ اجلاس میں شریک ریاستوں سے فوری مداخلت کی اپیل کی۔ ترجمان نے قطر، ترکی، مصر اور امریکہ پر بطور ضامن اپنی ذمہ داریاں ادا کرنے پر زور دیا۔ ان کا کہنا تھا کہ اسرائیلی خلاف ورزیوں کو روکنے کے لیے مؤثر اور عملی اقدامات ناگزیر ہو چکے ہیں۔ اگر عالمی برادری نے مداخلت نہ کی تو یہ حملے جنگ بندی معاہدے کو بے معنی بنا دیں گے۔