جی 7 ممالک نے بھی غزہ میں جنگ بندی کا مطالبہ مسترد کردیا

ٹوکیو: جی سیون ممالک نے بھی اسرائیل اور امریکا کا موقف اختیار کرلیا اور جاپان میں دو روزہ اجلاس کے بعد جاری اعلامیہ میں جنگ بندی کے بجائے عارضی وقفے پر زور دیا گیا ہے۔ اعلامیہ میں غزہ کی انسانی صورتحال پر تشویش کا اظہارکیا گیا۔ بیان میں کہا گیا ہے کہ انسانی بحران سے نمٹنے کے لیے ہنگامی کارروائی کی جائے۔ دروغ گوئی کا مظاہرہ کرتے ہوئے کہا گیا کہ بین الاقوامی قوانین کے مطابق اسرائیل کو اپنے دفاع کا حق ہے۔(جبکہ اسرائیل قابض ریاست ہے جسے دفاع کا حق نہیں ہوتا).
اعلامیہ میں کہا گیا ہے کہ رکن ممالک تنازع کو پھیلنے سے روکنے اور حماس کو فنڈز کی فراہمی روکنے سمیت دیگر اقدامات پر بھی کام کر رہے ہیں۔ بیان میں ایرانی حکومت سے مطالبہ کیا گیا ہے کہ وہ حماس اور حزب اللہ کی حمایت ترک کرے۔یرغمال بنائے گئے تمام افراد کو رہا کیا جائے۔ جی سیون ممالک میں امریکا، کینیڈا، جرمنی، اٹلی، جاپان اور برطانیہ شامل ہیں۔