Raza Musani 
تہران: ایرانی صدر آیت اللہ سید ابراہیم رئیسی نے شام کے مرکزی صوبے حمص میں دہشت گردانہ حملے کے بعد شامی حکومت، فوج اور عوام کے ساتھ اظہار یکجہتی کیا ہے۔ صدر ابراہیم رئیسی نے کہا کہ دہشت گردی کا یہ اقدام خطے میں بدامنی پھیلانے اور ترقی اور پیشرفت کا سلسلہ روکنے کی سازش ہے۔ دشمن ان اقدامات کے ذریعے شام کے مظلوم عوام کے خلاف جاری وحشیانہ دہشت گردی جاری رکھنا چاہتے ہیں۔ ادھر ایران کی وزارت خارجہ کے ترجمان نے شام میں ہونے والے دہشت گرد حملے کی سخت مذمت کرتے ہوئے شامی حکومت، عوم اور فوج سے مکمل یکجہتی کا اظہار کیا ہے۔ ناصر کنعانی نے غیر ملکی حمایت یافتہ دہشت گردوں کی مذمت کرتے ہوئے کہا کہ اقوام متحدہ کی سلامتی کونسل کو چاہئے کہ دہشت گردی کے خلاف اپنی ذمہ داریاں پوری کرنے کے لئے اقدامات کرے۔
