موجودہ حالات تنازعہ فلسطین کا حل نہ نکلنے کا نتیجہ ہیں، اقوام متحدہ

نیویارک : اقوام متحدہ کے سیکریٹری جنرل انتونیو گوتریس نے بھی آخر کار تسلیم کرلیا کہ موجودہ حالات تنازع فلسطین کا حل نہ نکلنے کا نتیجہ ہے۔ انتونیو گوتریس نے اسرائیل پر غزہ سے گھناؤنے حملوں کی ایک بار پھر مذمت کی اور انہیں روکنے کا مطالبہ کیا۔ انہوں نے کہا کہ وہ فلسطینی عوام کی جائز شکایات کو تسلیم کرتے ہیں لیکن دہشتگردی کی ان کارروائیوں اور شہریوں کے قتل اور اغوا کا کوئی جواز نہیں ہے۔ انہوں نے تسلیم کیا کہ یہ تشدد 56 سالہ طویل قبضے کے تنازعے اور اس کا کوئی سیاسی حل نہ نکلنے کی وجہ سے ہوا ہے۔ انہوں نے مزید کہا کہ انہیں اسرائیلی حکام کی طرف سے حملوں کے جواب میں غزہ پر مکمل محاصرہ کرنے کے فیصلے پر شدید تشویش ہے۔ انہوں نے کہا کہ وہ اسرائیل کے جائز سکیورٹی خدشات کو سمجھتے ہیں لیکن فوجی آپریشن بین الاقوامی انسانی قوانین کے مطابق کیا جانا چاہیے۔ انہوں نے شہریوں کے تحفظ اور احترام کی اہمیت پر زور دیتے ہوئے کہا کہ شہری مقامات اور بنیادی انفراسٹرکچر کو نشانہ نہ بنایا جائے۔