غزہ پر وحشیانہ حملے جاری، مزید 40 شہید، مجموعی تعداد 10 ہزار سے تجاوز، بیشتر خواتین و بچے شامل

غزہ : صیہونی جنگی طیاروں نے بتیس ویں دن بھی غزہ پر خوفناک حملے جاری رکھے۔ رات بھر بمباری سے مزید چالیس افراد شہید اور کئی زخمی ہوگئے۔ صیہونی فوج نے خان یونس کے ضلع معان میں رہائشی عمارت کو نشانہ بنایا۔جس میں آٹھ افراد شہید ہوئے۔ غزہ شہر کے ناصر میڈیکل کمپلیکس پر حملے میں آٹھ جبکہ رفح میں چودہ افراد جان سے گئے۔ الشبورہ پناہ گزین کیمپ میں بھی رہائشی کمپلیکس کو نشانہ بنایا گیا جس میں دس شہادتیں ہوئیں۔ درجنوں زخمیوں کو بھی اسپتال لایا گیا۔ شہدا میں بیشتر خواتین اور بچے ہیں۔ صیہونی جنگی طیاروں کی خوفناک بمباری نےغزہ کو ملیا میٹ کردیا۔ ایک ماہ سے جاری وحشیانہ حملوں میں شہدا کی تعداد دس ہزار سے تجاوز کرچکی ہے۔ جبکہ پچیس ہزار سے زائد زخمی ہیں۔
سات اکتوبر سے جاری خونی حملوں نے غزہ کا چپہ چپہ خون میں نہلا دیا ہے۔ اسپتال۔ اسکول۔ مساجد۔ چرچ۔ پناہ گاہیں۔ رہائشی عمارتوں سمیت کوئی مقام محفوظ نہ رہا۔ ادھر مغربی کنارے میں بھی صیہونی دہشت گردی جاری ہے۔ تلکرم اور بیت عنان میں مزید دو افراد شہید ہوئے۔ چوبیس گھنٹوں میں شہدا کی تعداد گیارہ ہوگئی ہے۔ سات اکتوبر کے بعد مغربی کنارے میں 152 افراد شہید ہوچکے ہیں۔