Raza Musani 
تہران : ایرانی صدر آیت اللہ ابراہیم رئیسی نے کہا ہے کہ صیہونی حکومت کی اسلامی ممالک کے ساتھ تعلقات قائم کرنے کی کوششیں بے نتیجہ ثابت ہوں گی۔ صیہونیوں کا مقصد فلسطینی جوانوں کو آزادی سے مایوس کرنا ہے۔ جہاد اسلامی کے سربراہ زیاد النخالہ سے ملاقات میں ابراہیم رئیسی نے کہا کہ کائنات کا نظام حق پر مبنی ہے جس میں باطل کو قبول کرنے کی کوئی گنجائش نہیں ہے۔ ایک زمانے میں سب کی نظریں مذاکرات پر مرکوز تھیں لیکن آج مذاکرات کے حامی بھی مقاومت کی طرف دیکھ رہے ہیں۔ کامیابی مقاومت کو ملے گی یہی اللہ کا وعدہ ہے۔ انہوں نے مزید کہا کہ صبر اور استقامت کی وجہ سے فلسطینیوں کو غاصب صیہونی حکومت پر فتح نصیب ہوگی اور فلسطینی عوام سرخرو ہوں گے۔ انہوں نے کہا کہ صیہونی حکومت فلسطینی جوانوں کے اندر مایوسی پھیلانا چاہتی ہے۔ اسلامی ممالک کے ساتھ تعلقات قائم کرنے کا مقصد فلسطینی علاقوں کی واپسی کو ناکام بنانا ہے لیکن صیہونی حکومت کو ان کوششوں میں ناکامی ہوگی کیونکہ اسلامی ممالک کے عوام صہیونی حکومت کے ساتھ تعلقات کے خلاف ہیں۔ صدر رئیسی نے مزید کہا کہ فلسطینی عوام پہلے سے زیادہ عزم اور حوصلے کے ساتھ صیہونی حکومت کے سامنے کھڑے ہیں۔ آج دنیا کی نظریں فسلطینی عوام پر مرکوز ہیں۔ شہید قاسم سلیمانی سمیت مقاومت کے شہداء کا خون رنگ لائے گا اور کامیابی فلسطینی عوام کے قدم چومے گی۔
