دہشت گردوں کا دینِ اسلام سے کوئی تعلق نہیں، اتحاد، رواداری اور ہم آہنگی کے لیے ضابطۂ اخلاق جاری

اسلام آباد: اسلامی نظریاتی کونسل کے مطابق تمام مکاتبِ فکر کے علما نے متفقہ فتویٰ دیا ہے دہشت گردوں کا دینِ اسلام سے کوئی تعلق نہیں ہے۔ اسلامی نظریاتی کونسل نے ملک میں اتحاد، رواداری اور ہم آہنگی کے لیے ضابطۂ اخلاق جاری کر دیا۔ متفقہ فتویٰ میں کہا گیا ہےکہ خود کش حملہ شریعت کی روشنی میں حرام ہے، ریاستی ادارے ایسے گروہوں کےخلاف کارروائی کریں۔ فتویٰ کے مطابق حکومت، فوج ودیگر سیکورٹی اداروں کو غیر مسلم قرار دینا یا ان کےخلاف کارروائی حرام ہے۔ملکی اداروں کو غیر مسلم قرار دینا اسلامی تعلیمات کے منافی اور بغاوت کے مترادف ہے۔ فتوی میں کہا گیا ہے کہ تعلیمی اداروں کا مشن طلباکی تعلیم و تربیت ہے۔ کوئی عسکریت پسندی، نفرت، انتہا پسندی میں ملوث ہوتو ریاست کو کارروائی کرنی چاہیے۔ کسی فرد، مسلک یا ادارے کے خلاف نفرت انگیز تقریر کی ممانعت ہے۔ کوئی عالم دین کسی شخص کو غیر مومن قرار نہیں دے گا کیونکہ یہ عدالتی دائرہ اختیار ہے۔