Raza Musani 
کوئٹہ : کوئٹہ میں بلوچستان نیشنل پارٹی کی جلسہ گاہ کے قریب دھماکے میں تیرا افراد جاں بحق اور تیس سے زائد زخمی ہوگئے ہیں۔ زخمیوں میں سابق رکن اسمبلی سمیت بلوچستان نیشنل پارٹی کے دو رہنما اور پولیس اہلکار بھی شامل ہیں۔ ہلاک اور زخمی ہونے والوں میں زیادہ تر بی این پی کے کارکن شامل ہیں، جبکہ جلسے کی سیکیورٹی پر مامور پولیس اہلکار بھی زخمی ہوئے ہیں۔ پولیس کا کہنا ہے کہ دھماکہ خودکش تھا۔ دھماکا کوئٹہ کے علاقے سریاب روڈ پر شاہوانی اسٹیڈیم کے نزدیک ہوا جہاں بلوچستان نیشنل پارٹی کے زیر اہتمام سابق وزیراعلیٰ سردار عطاء اللہ مینگل کی برسی کی مناسبت سے جلسہ ہورہا تھا۔ لاشوں اور زخمیوں کو فوری طور پر سول ہسپتال کوئٹہ منتقل کیا گیا۔ جہاں ایمرجنسی نافذ کر دی گئی۔
