مغربی کنارے میں شہریوں اور املاک پر حملے روکے جائیں، گوتریس

نیویارک: اقوام متحدہ کے سیکریٹری جنرل انتونیو گوتریس نے مقبوضہ مغربی کنارے میں غیرقانونی صیہونی آبادکاروں کے حالیہ حملوں کی شدید مذمت کی ہے۔ انہوں نے شہریوں اور املاک پر حملوں کا خاتمہ اور خطے میں امن کیلئے عملی اقدامات کی ضرورت پر زور دیا ۔سیکریٹری جنرل کے ترجمان اسٹیفن دوجارک نے بتایا کہ گوتریس نے مقبوضہ مغربی کنارے میں فلسطینیوں اور ان کی جائیداد کے خلاف غیرقانونی صیہونی آبادکاروں کے حملوں کی سخت الفاظ میں مذمت کی۔ انہوں نے کہا ہے کہ بڑھتے ہوئے حملوں کے نتیجے میں اموات اور لوگ زخمی ہوئے۔ بڑے پیمانے پر نقصان ہوا ہے۔ بعض اوقات یہ واقعات پوری کمیونٹی کے نقل مکانی کا سبب بنتے ہیں۔ دوجارک نے واضح کیا کہ سیکریٹری جنرل کی پوزیشن یہ ہے کہ اسرائیلی بستیاں اور ان کے متعلقہ ڈھانچے کسی قانونی جواز کے حامل نہیں ہیں اور بین الاقوامی قانون اور اقوام متحدہ کی متعلقہ قراردادوں کی صریح خلاف ورزی ہیں۔