سعودیہ اسرائیل سے باضابطہ تعلقات پر تیار، ایف 35 طیاروں کی فراہمی کی شرط رکھ دی

ریاض : سعودی عرب نے اسرائیل سے تعلقات ایف 35 طیاروں کی فراہمی سے مشروط کردئیے۔اسرائیلی اخبار یدیعوت آحارنوت نے دعویٰ کیا ہے کہ ولی عہد محمد بن سلمان اور نامزد اسرائیلی وزیراعظم نیتن یاہو براہ راست رابطے میں ہیں۔ حالیہ انتخابات کے بعد ریاض اور تل ابیب کے درمیان تعلقات کو معمول پر لانے کے لیے نیتن یاہو نے محمد بن سلمان اور امریکی صدر جو بائیڈن سے کئی بار خفیہ گفتگو کی۔ مذاکرات پر آمادگی کا اظہار کرنے والے بن سلمان نے ایسی شرطیں رکھی ہیں جن میں بائیڈن حکومت کے ساتھ تعلقات بحال کرنا اور جدید ہتھیاروں کی فروخت خاص طور پر ایف-35 جنگی طیاروں کی فروخت پرعائد پابندی کو ہٹانا شامل ہے۔ جبکہ اسرائیلی حکومت سعودی عرب کو ایف 35 طیاروں کی فراہمی کی سب سے بڑی مخالف رہی ہے۔