سلمان رشدی خود اپنے اوپر حملے کا ذمہ دار ہے، ایران کا تعلق نہیں، ترجمان

تہران : ایران نے ملعون سلمان رشدی کو خود پر حملے کا ذمہ دار قرار دیتے ہوئے اس سے کسی بھی قسم کا تعلق مسترد کردیا، وزارت خارجہ کے ترجمان نصیر کینانی نے ہفتہ وار بریفنگ میں کہا کہ ایران اس حملے سے کسی بھی قسم کے تعلق کی تردید کرتا ہے۔ کسی کو یہ حق حاصل نہیں کہ وہ اسلامی جمہوریہ ایران پر اس قسم کی بے بنیاد الزام تراشی کرے۔ آزادی رائے کا حق سلمان رشدی کو مذہب کی توہین کرنے کا جواز مہیا نہیں کرتا۔اس حملے کا ذمہ دار ہم کسی اور کو نہیں بلکہ رشدی اور اس کے حامیوں کو سمجھتے ہیں اور انھیں قابل مذمت قرار دیتے ہیں۔ ترجمان نے کہا کہ ‘مذہب اسلام کی توہین اور ڈیرھ ارب مسلمانوں کے لیے مقدس تصور کی جانے والی حدود عبور کر کے سلمان رشدی نے خود اس الہامی مذہب کے ماننے والوں کے غیض و غضب کو دعوت دی تھی۔انھوں نے کہا کہ ایران کو اس حملہ آور کے بارے میں صرف اتنا ہی معلوم ہے جو اب تک ذرائع ابلاغ میں شائع ہوا ہے۔