Raza Musani 
راولپنڈی : آرمی چیف جنرل عاصم منیر کی زیر قیادت 258 ویں کور کمانڈر کانفرنس ہوئی جس میں شرکاء کو داخلی سلامتی کی موجودہ صورتحال سے متعلق تفصیلی آگاہ کیا گیا اور فوج کی آپریشنل تیاریوں اور تربیتی پہلوؤں پر بھی غور کیا گیا۔ شرکا نے قرار دیا کہ کالعدم تحریک طالبان پاکستان ٹی ٹی پی اور دیگر دہشت گرد گروپوں سے ملکی سلامتی کو خطرہ ہے، کالعدم ٹی ٹی پی اور اس سے منسلک دیگر گروہوں کے دہشت گردوں کی پڑوسی ملک میں محفوظ پناہ گاہیں ہیں۔ شرکا کو بتایا گیا کہ ٹی ٹی پی اور دیگر دہشت گرد گروپ پاکستان میں مسائل پیدا کر رہے ہیں۔ جنرل سید عاصم منیر نے کہا ہے کہ معروضی تربیت ہماری پیشہ وارانہ مہارت کا خاصہ ہے، ہمیں قومی سلامتی کو لاحق کسی بھی خطرے سے نمٹنے کیلئے ہمیشہ تیار رہنا چاہئے۔ شرکاء نے اس عزم کا اظہار کیا کہ حکومت کی جانب سے معیشت کی بحالی کے لیے منصوبہ بندی اور حکمت عملی کے اقدامات پر عوام کی مجموعی بھلائی کیلئے ہر ممکن تکنیکی اور انتظامی معاونت فراہم کی جائے گی۔
