ڈنمارک میں 5 سفارتخانوں کے باہر قرآن سوزی، سویڈن میں بھی قرآن نذر آتش

کوپن ہیگن: سویڈن اور ڈنمارک میں قرآن کریم کی توہین کے واقعات تھم نہ سکے۔ یورپی یونین نے اسے ذاتی اشتعال انگیزی قرار دیدیا۔ ڈنمارک کے دارالحکومت کوپن ہیگن میں اسلام دشمن گروہ ڈانسک پیٹریاٹس نے چوتھے روز بھی قرآن کی بےحرمتی جاری رکھی۔ گروپ کے ارکان نے پولیس کی حفاظت میں اس بار ترکیہ، عراق، مصر، سعودی عرب اور ایرانی سفارت خانوں کے سامنے قرآن پاک کو نذر آتش کیا۔ شرپسندوں نے اسلام کے خلاف نعرے لگائے اور اسلام مخالف بینرز لہرائے۔ اس گھناؤنے فعل کو سوشل میڈیا پر لائیو سٹریم کیا گیا۔ ادھر سوئڈن میں بھی ایک بار پھر قرآن سوزی کی گئی۔ دارالحکومت اسٹاک ہوم میں ایرانی نژاد ملعون بیرامی مرجان نے ضلع برومہ کے ساحل پر قرآن کا نسخہ جلایا۔ اسے بھی پولیس کا تحفظ حاصل رہا۔ ملعون نے کہا کہ تمام مذاہب کو تباہ کر دینا چاہیے۔ ادھر یورپی یونین نے توہین قرآن کو انفرادی اشتعال انگیز قرار دیکر اپنی جان چھڑالی۔ یورپی یونین کی خارجہ امور اور سلامتی کی پالیسی کی ترجمان نبیلہ مسرالی نے کہاکہ یورپ میں نسل پرستی اور زاینو فوبیا کی کوئی جگہ نہیں ہے۔