Raza Musani 
کولمبو : سری لنکا میں بدترین معاشی بحران پر احتجاج کے دوران مشتعل مظاہرین نے وزیراعظم وکرما سنگھے اور صدر گوٹابایا راجا پاکسے کے گھروں کو آگ لگا دی۔ صدارتی محل پر عوام کے حملے کے بعد وزیراعظم وکرما سنگھے نے بھی مستعفی ہونے اور کُل جماعتی حکومت بنانے پر رضامند ظاہر کی ہے، وزیراعظم کے دفتر سے جاری اعلامیے میں کہا گیا ہے رانیل وکرما سنگھے معاشی بحران کے حل کے لیے کُل جماعتی حکومت بنانے اور مستعفی ہونے کے لیے تیار ہیں۔ اس سے پہلے صدر گوٹابایا راجا پاکسے نے مستعفی ہونے کا فیصلہ کیا تھا۔
گزشتہ روز ہزاروں مظاہرین رکاوٹیں توڑتے ہوئے صدارتی محل میں داخل ہو گئے تھے جہاں مظاہرین نے صدارتی محل کے اندر بنے سوئمنگ پول میں ڈبکیاں بھی لگائیں اور صدارتی کچن میں کھانے بھی کھائے۔مشتعل مظاہرین نے صدر گوٹابایا راجا پاکسے اور وزیراعظم وکرما سنگھے کے گھروں کو بھی نذر آتش کر دیا مظاہرین نے دعویٰ کیا ہے کہ دھاوے کے دوران صدر کے گھر سے بڑی رقوم برآمد ہوئی ہیں۔ برآمد ہونے والی رقم سیکیورٹی یونٹس کے حوالے کردی گئی ہے۔ اس سلسلے میں سوشل میڈیا پر جاری ویڈیوز میں دیکھا جا سکتا ہے کہ مظاہرین مبینہ طور پر صدر راجاپاکسے کے گھر سے ملنے والے کرنسی نوٹوں کو گنتے ہوئے دکھائی دے رہے ہیں۔
