لیبیا میں سیاسی بحران میں شدت، طبروق میں مظاہرین نے پارلیمنٹ کو آگ لگادی

طرابلس : لیبیا میں نگراں وزیراعظم اور انکے مخالف گروپ کے درمیان سیاسی تنازع شدت اختیار کرگیا۔ طبروق شہر میں سینکڑوں مظاہرین نے مشرقی پارلیمنٹ کی عمارت پر دھاوا بول دیا۔مظاہرین پارلیمنٹ میں گھسے تو عمارت خالی تھی۔ مظاہرین نے خالی عمارت کو آگ لگادی۔ مظاہرین نے دوسری سرکاری عمارتوں پر بھی حملے کئے۔ نگراں وزیراعظم عبدالحمید طرابلس میں مقیم ہیں۔ جبکہ طبروق میں موجود پارلیمانی عمارت مخالف حکومت کے وزیراعظم فتح بشاگا کے ماتحت ہے۔ یہ حملہ اس وقت کیا گیا جب جنیوا میں اقوام متحدہ کی ثالثی میں ہونے والے مذاکرات کے دوران فریقین انتخابات کے حوالے سے کسی معاہدے تک پہنچنے میں ناکام رہے۔ نگراں وزیراعظم عبدالحمید نے مظاہرین کی حمایت میں ٹوئٹ کرتے ہوئے کہا کہ تمام سیاسی جماعتیں بشمول سیاسی حکومت اقتدار چھوڑ دیں، حکومت کا قیام انتخابات کے ذریعے ہوگا۔