پاکستان اور چین کے درمیان تعاون مزید بڑھانے کے عزم کا اعادہ

اسلام آباد: پاکستان اور چین نے خطے کے امن، استحکام اور خوشحالی کے لیے مل کر کام کرنے کے عزم کا اعادہ کیا ہے۔ پاکستانی وزیراعظم شہباز شریف سے اعلیٰ سطح وفد کے ہمراہ چینی وزیر خارجہ وانگ ایی نے ملاقات کی۔ شہباز شریف نے چین کی پاکستان کے ساتھ مستقل حمایت پر اظہارِ تشکر کیا۔ ان کا کہنا تھا کہ پاکستان، چین کے بنیادی مسائل پر غیر متزلزل حمایت جاری رکھے گا۔
چینی وزیر خارجہ نے دوطرفہ تعلقات کو نئی بلندیوں پر لے جانے کے عزم کا اظہار کیا۔ اس سے قبل چینی وزیر خارجہ نے ایوان صدر میں صدر آصف علی زرداری سے ملاقات کی جس میں دوطرفہ تعاون اور علاقائی سلامتی سے متعلق امور پر بھی تبادلہ خیال کیا گیا۔
چین کے وزیرِ خارجہ وانگ ایی کے ہمراہ مشترکہ پریس کانفرنس سے خطاب کرتے ہوئے نائب وزیراعظم اسحٰق ڈار کا کہنا تھا کہ پاکستان اور چین کے درمیان تعلقات برادرانہ بنیادوں پر قائم ہیں اور دونوں ممالک ہر سطح پر تعاون کو مزید فروغ دینے کے لیے پرعزم ہیں۔