Raza Musani 
اسلام آباد: یونان سانحہ کے بعد پاکستان میں انسانی اسمگلرز کیخلاف آپریشن تیز کردیا گیا۔ مزید دو ملزمان کی گرفتاری سے تعداد 15 تک جاپہنچی۔ یونان کے پانیوں میں تین سو سے زیادہ پاکستانیوں کی ہلاکت پر حکومت کو ہوش آگیا اور صوبہ پنجاب میں انسانی اسمگلرز کے گرد گھیرا تنگ کردیا گیا ۔ منگل کو مزید دو ملزمان کی گرفتاری سے گرفتار انسانی اسمگلرز اور ان کے سہولت کاروں کی تعداد 15 ہوگئی ہے۔ فیڈرل انویسٹی گیشن ایجنسی ایف آئی اے نے 6 مقدمات درج کیے ہیں جن میں 20 سے زائد انسانی اسمگلروں کو نامزد کیا گیا ہے۔ وزیر داخلہ رانا ثنا اللہ نے کہا ہے کہ یونان کشتی سانحے کی تحقیقات ایک ہفتے میں مکمل کر لی جائیں گی۔ ملوث ملزمان کے خلاف قانونی چارہ جوئی کے لیے خصوصی قانون سازی کی جائے گی۔ انہوں نے کہاکہ بیرون ملک بیٹھے انسانی اسمگلرز کی گرفتاری کیلئے عالمی تعاون بھی حاصل کیا جائے گا۔
