مقبوضہ کشمیر میں قابض فورسز کا ماتمی جلوسوں پر دھاوا

سری نگر : مقبوضہ کشمیر میں قابض بھارت کی جارحیت جاری ہے، قابض بھارتی فورسز نے محرم کے جلوس روک دیے۔ پابندیوں کے باوجود کئی علاقوں میں کشمیریوں نے جلوس برآمد کرنے کی کوشش کی۔ سرینگر میں پُرامن عزاداروں پر قابض بھارتی فوج نے شیلنگ اور لاٹھیوں کا بے دریغ استعمال کیا۔ سرینگر کے سول لائنز علاقوں بشمول لال چوک، ڈل گیٹ اور بڈشاہ چوک کی مکمل ناکہ بندی کے باوجود کئی مقامات سے جلوس عزاء برآمد کرنے کی کوشش کی گئی، جس دوران دسیوں عزاداروں کو حراست میں لیا گیا۔ پُرامن عزاداروں پر قابض فورسز نے لاٹھیوں کا استعمال کرکے عزاداروں کو شدید زخمی کیا اور کئی عزاداروں کو حراست میں لیا گیا۔ پولیس نے کوریج کرنے والے بعض صحافیوں پر بھی لاٹھیاں برسائیں اور انہیں پیشہ وارانہ ذمہ داریوں کی انجام دہی سے روکا گیا۔ جلوسوں کو روکنے کے لیے مقبوضہ کشمیر میں کرفیو جیسی پابندیاں نافذ کر دی گئی ہیں۔ سری نگر اور ملحقہ علاقوں میں سخت پابندیاں عائد کرتے ہوئے انٹر نیٹ اور موبائل سروسز معطل کر دی گئی ہیں۔