اسرائیل سے تعلقات معمول پر لانا فی الحال مشکل ہے، شام

نیویارک : شام پر قابض حکومت کے وزیر خارجہ اسعد الشیبانی نے دعویٰ کیا ہےکہ اسرائیل کی مسلسل دھمکیوں اور شام کی سرزمین پر قبضے کے باعث اسرائیل کے ساتھ تعلقات معمول پر لانا فی الحال مشکل ہے۔ اسعد الشیبانی نے سی این این کو انٹرویو میں واضح کیا کہ جب تک شام پر اسرائیلی خطرات موجود ہیں اور گولان سمیت دیگر علاقے قبضے میں ہیں، اس وقت ابراہام معاہدوں یا تعلقات کی بحالی کی بات ممکن نہیں۔ ان کا کہنا تھا کہ شام نے بارہا اعلان کیا ہے کہ وہ خطے میں کسی کے لیے خطرہ نہیں ہے، مگر اس کے باوجود اسرائیل کی جانب سے دھمکی آمیز رویہ جاری ہے۔ الشیبانی نے مستقبل کا نقشہ پیش کرتے ہوئے کہا کہ شام آنے والے برسوں میں ایک مضبوط اور مستحکم ملک کے طور پر ابھرے گا، جس کے شہری واپس آ کر سرمایہ کاری کریں گے اور جو اپنے ہمسایوں کے ساتھ دوستانہ تعلقات اور دنیا بھر سے تعاون کو فروغ دے گا۔