غزہ میں امداد کی بحالی کیلئے بین الاقوامی برادری سے نئی اپیل

جنیوا : اقوام متحدہ کی امدادی ایجنسی انروا کے سربراہ فلپ لازارینی نے غزہ میں امداد کی بحالی کیلئے بین الاقوامی برادری سے نئی اپیل کردی۔ فلپ لازارینی نے کہا کہ غزہ میں امداد کی اجازت دینے کے لیے اسرائیل پر دباؤ ڈالنے میں ناکامی فلسطینیوں کے بھوک سے مرنے میں ملوث ہونے کے مترادف ہے۔ انہوں نے کہا کہ عالمی برادری کی اپنی بے عملی سے انسانیت کھو رہی ہے۔
انہوں نے کہا کہ یہ سب انسانوں کا بنایا ہوا ہے جس میں اسرائیل کو مکمل استثنیٰ حاصل ہے۔ لازارینی نے مزید کہا کہ کھانے پینے کی اشیاء صرف چند کلومیٹر کے فاصلے پر دستیاب ہیں۔ انروا کے پاس اگلے تین ماہ کے لیے پوری آبادی کے لیے غزہ سے باہرخوراک کا وافر ذخیرہ موجود ہے۔ انہوں نے سیاسی قوت ارادی کی فوری ضرورت پر زور دیتے ہوئے کہا کہ صرف سیاسی قوت ارادی اور قیادت ہی مکمل بھوک کو ختم کر سکتی ہے۔