ریاست پر عدم اعتماد، 54 فیصد اسرائیلیوں کا ہجرت پر غور

تل ابیب : اسرائیل میں 54 فیصد شہری ملک چھوڑنے پر غور کرنے لگے۔ اسرائیلی دارالحکومت تل ابیب اور جافا میں ریسرچ انسٹی ٹیوٹ کی تحقیق میں اسرائیلی نوجوانوں کی اکثریت میں ریاستی اداروں پر عدم اعتماد کی نشاندہی کی گئی ہے۔ تحقیق کے مطابق اعتماد کا فقدان اس قدر بڑھ گیا ہے کہ نوجوانوں کی اکثریت اسرائیل سے نکلنے پر غور کررہی ہے۔ ملک کے اندر بگاڑ بڑھ گیا ہے اور لوگوں میں ذاتی عدم تحفظ کا احساس بڑھتا جارہا ہے۔ تحقیق کے نتائج سے پتہ چلتا ہے کہ 52 فیصد نوجوان محسوس کرتے ہیں کہ ریاست امتیازی سلوک کی پالیسی پر عمل پیرا ہے اور 62 فیصد محسوس کرتے ہیں کہ وہ مشکلات کا سامنا کرنے میں اکیلے ہیں۔ 42 فیصد نے کہا کہ وہ اپنی نسل کو بدقسمت سمجھتے ہیں۔ گذشتہ سال 18 سے 44 سال کی عمر کے 34 فیصد افراد نے ملک چھوڑنے کی خواہش کا اظہار کیا تھا۔