Raza Musani 
لاہور: تحریک انصاف کے رکن قومی اسمبلی اور پنجاب اسمبلی کے اپوزیشن لیڈر سمیت نو رہنماؤں اور ستر کارکنوں کو فوجی تنصیبات پر حملوں کے کیس میں دس دس سال کی سزا سنادی۔
لاہور میں انسدادِ دہشت گردی کی عدالت نے پی ٹی آئی رہنماؤں عمر سرفراز چیمہ، ڈاکٹر یاسمین راشد، اعجاز چوہدری اور میاں محمود الرشید سمیت آٹھ افراد کو دس دس سال قید کی سزا سنا دی۔ پی ٹی آئی رہنماؤں پر نو مئی دو ہزار تئیس کو سابق وزیراعظم عمران خان کی گرفتاری کے بعد فوجی تنصیبات کے قریب شیر پاؤ پل پر جلاؤ گھیراؤ کا الزام ہے۔
اسی مقدمہ میں سابق وزیرخارجہ شاہ محمود قریشی سمیت چھ رہنماؤں کو بری کردیا گیا۔ اس سے پہلے سرگودھا شہر کی خصوصی عدالت نے پنجاب اسمبلی کے اپوزیشن لیڈر احمد خان بھچر اور رکن قومی اسمبلی احمد چھٹہ سمیت دیگر ملزمان کو دس دس سال قید کی سزائیں سنائیں۔ ان پر بھی نو مئی کو جلاؤ گھیراؤ کے الزامات ہیں۔
چیئرمین تحریک انصاف بیرسٹر گوہر علی خان کا کہنا تھا کہ یہ فیصلے ملک کے عدالتی نظام پر سوالیہ نشان ہیں جس سے جمہوریت کو بھی شدید نقصان پہنچے گا۔ عوام کا عدالتوں پر سے اعتماد اٹھ گیا ہے۔
