Raza Musani 
لندن : فلسطین کی حامی تنظیموں نے غزہ پر صیہونی حملوں کی مذمت کرتے ہوئے، برطانوی وزیر اعظم کے دفتر کے سامنے مظاہرہ کیا۔ اسلامی انسانی حقوق کی تنظیم، اہل بیت (ع) اسلامی فاؤنڈیشن، فلسطین کی حامی یہودی اور اسکاٹش تنظیموں سمیت متعدد انسانی حقوق کے کارکنوں کے تعاون سے کئے گئے احتجاج میں متعدد شخصیتوں نے شرکت اور تقریر کی۔ ایک افریقی گروہ کے نمائندے نےاعلان کیا کہ افریقی عوام بالخصوص جنوبی افریقا کے باشندے فلسطینی عوام کے شانہ بشانہ کھڑے ہیں اور ان کی جد و جہد میں ان کے ساتھ ڈٹے رہیں گے۔ انہوں نے زور دیکر کہا کہ نیلسن منڈیلا بھی فلسطین کے حامی تھے اور افریقی عوام ان کی پیروی کرتے ہوئے یہ حمایت جاری رکھیں گے۔ احتجاجی اجتماع میں مختلف نسلوں سے تعلق رکھنے والے برطانوی شہریوں نے شرکت کی اور فلسطینیوں کی حمایت پر زور دیا گیا۔ مظاہرین نے فلسطین کے نہتے شہریوں پر ڈھائے جانے والے صیہونی مظالم اور برطانوی حکومت کی جانب سے تل ابیب کی اندھی حمایت کی بھی مذمت کی۔اس دوران فلسطین کو آزاد کرکے رہیں گے اور فلسطین کی حمایت جاری رہے گی جیسے نعرے بھی لگائے جا رہے تھے۔
