پہلگام واقعے میں مقامی دہشت گرد ملوث ہو سکتے ہیں، چدمبرم

نئی دہلی : انڈیا کے سابق وزیر داخلہ اور کانگریس رہنما پی چدمبرم نے پہلگام دہشت گردی میں مقامی افراد کے ملوث ہونیکا بیان دیکر سیاسی تنازع کھڑا کردیا ہے۔
نیوز آؤٹ لیٹ دی کوئنٹ کو انٹرویو میں پی چدمبرم نے کہا کہ حکومت نے پہلگام واقعہ سے متعلق کافی معلومات فراہم نہیں کیں۔ انہوں نے حکومت پر الزام لگایا کہ وہ اہم تفصیلات شیئر کرنے کو تیار نہیں ہے۔ انہوں نے تحقیقات میں نیشنل انویسٹی گیشن ایجنسی (این آئی اے) کے کردار پر بھی سوال اٹھایا اور کہاکہ پہلگام حملے کے بعد این آئی اے نے اب تک کیا پیشرفت کی، اس بارے میں حکومت کچھ بھی واضح کرنے سے کترا رہی ہے۔ چدمبرم نے کہاکہ ہم سب جانتے ہیں کہ وہ مقامی دہشت گرد ہو سکتے ہیں۔ آپ یہ کیوں سمجھتے ہیں کہ وہ پاکستان سے آئے ہیں؟ اس کا کوئی ثبوت نہیں ہے۔
بی جے پی نے کانگریس پر پاکستان کا دفاع کا الزام لگایا۔ بی جے پی لیڈر امیت مالویہ نے کہا کہ کانگریس ایک بار پھر پاکستان کو کلین چٹ دینے کی جلدی میں ہے۔ جب بھی انڈین فوج پاکستان کی سرپرستی میں ہونے والی دہشت گردی کا مقابلہ کرتی ہے کانگریس رہنما اپوزیشن سے زیادہ اسلام آباد کے وکیلوں کی طرح لگتے ہیں.