کراچی: ناصرانِ فلسطین کے زیرِ اہتمام یکجہتی امت اور دفاع فلسطین ریلی کا انعقاد

کراچی: شہر قائد میں ناصرانِ فلسطین کے زیرِ اہتمام شون سرکل کلفٹن سے بوٹ بیسن تک یکجہتی امت اور دفاع فلسطین ریلی کا انعقاد کیا گیا، جس میں بلاتفریق مذہب و مسلک اور ہر قسم کی سیاسی و گروہی وابستگی سے بالاتر ہو کر ہزاروں افراد نے شرکت کی۔ ریلی میں غزہ کے مظلوم فلسطینیوں پر ڈھائے جانے والے مظالم کے عنوان سے نمائش کا اہتمام کیا گیا تھا، جو عوام کی توجہ کا خصوصی مرکز بنی رہی۔ ریلی سے مختلف مذاہب جن میں ہندو، مسیحی اور سکھ برادری کے رہنماؤں کے علاوہ شیعہ سنی دیوبندی بریلوی اہلحدیث و صوفی رہنماؤں نے خطاب کیا۔ ریلی میں سول سوسائٹی اور وکلاء نے بھی کثیر تعداد میں شرکت کی۔
ریلی سے علامہ حسن ظفر نقوی، علامہ ناظر عباس تقوی، حسن رضا سہیل، علامہ صادق تقوی، علامہ عقیل موسیٰ، مولانا رجب علی بنگش، سید عباس حیدر زیدی، مولانا قاضی احمد نورانی، مولانا فیروز الدین رحمانی، منگلا شرما چیئرمین ہندو کونسل، پاکستان بشپ کونسل کے نمائندہ، سردار منگل سنگھ و دیگر نے خطاب کیا۔ شرکاء ریلی راستے بھر اسرائیل کے خلاف نعرے لگاتے رہے اور حماس اور حزب اللہ اور دیگر مزاحمتی تحریکوں کے مجاہدین اور غزہ فلسطین کے عوام سے اظہار یکجہتی کیلئے فلسطینی پرچم ہاتوں میں لئے مارچ کرتے رہے۔
ریلی سے خطاب کرتے ہوئے مقررین نے کہا کہ اب وقت آگیا ہے کہ اقوامِ عالم امریکا اور اسرائیل کے مظالم کے خلاف سخت اقدامات کریں، ورنہ تاریخ انہیں کبھی معاف نہیں کرے گی، اسرائیل کی ناجائز ریاست مٹ کر رہے گی اور مظلوم فلسطینیوں کا خون رنگ لائے گا۔ مقررین نے مزید کہا کہ اسرائیل کا خاتمہ نزدیک ہے، دنیا میں ظلم و جور کے خلاف مظلوم قوتیں اٹھ کھڑی ہوئی ہیں، شیطان بزرگ اور دیگر استکباری قوتوں کی بدترین شکست کا آغاز ہو چکا ہے۔