کراچی: نمائش تا تبت سینٹر عظیم الشان مردہ باد امریکا و اسرائیل ریلی

کراچی : ملت جعفریہ پاکستان کی نمائندہ جماعتوں کی جانب سے نمائش تا تبت سینٹر تک عظیم الشان مردہ باد امریکا، اسرائیل و بھارت ریلی نکالی گئی۔
جس میں ہزاروں کی تعداد میں مرد، خواتین اور بچے شریک ہوئے۔
ریلی سے جماعت اسلامی ، شیعہ علماء کونسل ، آئی ایس او، تحریک بیداری امت مصطفی(ص)، ہییت آئمہ(ع)، مجلس وحدت مسلمین کے رہنماؤں نے خطاب کیا۔
شرکائے ریلی سے خطاب کرتے ہوئے مقررین کا کہنا تھا کہ امریکہ کا ایران پر حملہ خود امریکی اور عالمی قوانین کے منافی ہے ایران نے جہاد فی سبیل اللہ کے مفہوم کو عملی جامہ پہنایا۔ دشمن آسمان سے بات کررہا تھا ایران نے اسے خلاء سے جواب دیا۔ ایران نے مسلم امہ اور مسلمان حکمرانوں کو ایک رہنمائی فراہم کی۔مقررین نے کہا امریکہ کا ایران پر حملہ کھلی جارحیت اور جنایت ہے ہم اسکی بھرپور انداز میں مذمت کرتے ہیں ساری دنیا نے دیکھ لیا کہ عالمی خلاف ورزیاں کرنے والے لفظ امن کا استعمال صرف اپنی ساکھ بحال رکھنے کے لئے کررہے تھے جبکہ اسرائیل گزشتہ کئی دہائیوں سے مسلمانوں کے خلاف سازشیں اور مسلم ممالک پر بلا جواز حملے کر رہا ہے۔ غزہ کے مظلوم عوام کا خون رنگ لے آیا آج عالم اسلام میں اتحاد کے نقارے بج رہے ہیں اسرائیل کے خلاف ایران کے جوابی حملے امت مسلمہ کے لئے باعث مسرت ثابت ہوئے پاکستان میں تمام مکاتب فکر جس جوش و ولولے کے ساتھ ہم آواز ہیں یہ خدا کا لطف اور انعام ہے۔ ایسے میں اگر کوئی انتشار و افتراق کا باعث بنتا ہے تو وہ دانستہ یا غیر دانستہ طور پر دشمن کا آلہ کار سمجھا جائے گا۔