اسرائیل کی سعودیہ سے تعلقات کی کوششیں سراب ہیں، حماس

غزہ: حماس نے صیہونی وزیراعظم نیتن یاہو کی سعودی عرب کے ساتھ تعلقات معمول پر لانے کی کوششوں کو سراب قرار دیا ہے۔حماس کے ترجمان جہاد طحہ نے قابض حکومت اور سعودی عرب کے درمیان معاہدے سے متعلق صیہونی وزیر اعظم کے حالیہ تبصروں کی مذمت کی۔ انہوں نے کہا کہ صیہونی حکومت کے ساتھ امن مذاکرات یا تعلقات معمول پر لانا محض ایک سراب اور دھوکہ ہے تاکہ صیہونی آبادیوں میں توسیع اور ہماری اراضی کی چوری کیلئے زیادہ سے زیادہ وقت حاصل کیا جاسکے۔ حماس کے ترجمان نے کہا کہ نیتن یاہو کا حالیہ بیان، جس میں انہوں نے اس بات کا اعادہ کیا کہ وہ فلسطینی ریاست کے قیام کی اجازت نہیں دیں گے، فلسطینی عوام اور ان کے قومی حقوق کے خلاف اس مجرمانہ اور جارحانہ عزائم اور منظم فاشسٹ رویے کو ایک بار پھر ثابت کرتا ہے۔ طحہ نے کہا کہ اس طرح کے فاشسٹ بیانات کا بہترین جواب فلسطینی عوام کا شانہ بشانہ کھڑا ہونا اور قابض حکومت کے خلاف ان کی جدوجہد اور مزاحمت میں ان کی ہر طرح کی حمایت کرنا ہے۔