Raza Musani 
غزہ: صیہونی فوج نے اکیس ماہ سے جاری نسل کشی مہم کے سلسلے کے تازہ حملوں میں خواتین اور بچوں سمیت اٹہتر فلسطینی شہید اور درجنوں زخمی کردئے۔
صیہونی فوج نے آج صبح سویرے شاطی کیمپ اور غزہ سٹی میں خیموں اور ایک مکان پر بمباری کرکے بارہ فلسطینی شہید اور کئی زخمی کردئے۔ اس سے پہلےغزہ سٹی کے زرقا محلے میں پانچ منزلہ مکان کو نشانہ بنایا گیا جس میں چودہ فلسطینی شہید ہوئے۔ اسرائیلی ٹینکوں نے تل الحوا میں بھی ایک مکان کو نشانہ بنایا جس میں بارہ افراد شہید اور پچیس سے زائد زخمی ہوئے۔ جن میں سے بعض کی حالت نازک ہے۔
صیہونی فوج کے حملوں میں خواتین اور بچوں سمیت درجنوں زخمیوں کو اسپتال لایا گیا۔ صیہونی فوج کی نسل کشی مہم میں شہدا کی مجموعی تعداد اٹھاون ہزار چار سو تک جاپہنچی ہے۔
ادھر غزہ کے مشرقی علاقے جبالیہ میں مزاحمت کاروں نے اسرائیلی فوجی گاڑی کو ٹینک شکن میزائل سے اڑادیا۔ اس مہلک حملے میں تین صیہونی فوجی ہلاک اور ایک زخمی ہوگیا۔ لاشوں اور زخمی کو فوری طور پر ہیلی کاپٹر کے ذریعے شفٹ کیا گیا۔
