شام میں اسرائیلی بمباری علاقائی خودمختاری کی خلاف ورزی ہے، انتونیو گوتریس

نیویارک : اقوام متحدہ کے سیکریٹری جنرل انتونیو گوتریس نے کہا ہے کہ شام میں اسرائیلی بمباری علاقائی خودمختاری کی خلاف ورزی پر مبنی ہے، اسے رکنا چاہیے۔ سیکریٹری جنرل انتونیو گوتریس نے اخبار نویسوں سے بات کرتے ہوئے کہا کہ شام کی خودمختاری پوری طرح بحال ہونی چاہیئے اور اس کے خلاف جارحیت کے تمام اقدامات روک دینے چاہییں۔ اسرائیلی فوجوں کو واپس اپنے علاقے میں چلے جانا چاہیے اور گولان کی پہاڑیوں کے پاس سے قبضہ ختم کر دینا چاہیے۔ ان کا کہنا تھا کہ اقوام متحدہ کی توجہ شام میں ایک جامع سیاسی حل کے لیے کوششوں پر مرکوز ہے اور ایک بہت بڑے انسانی المیے دوچار ہوچکے شام کو اس جنگی کیفیت سے نکالا جائے۔ انہوں نے مزید کہا ہے کہ شام کی تاریخ میں یہ ایک بڑا اہم موقع ہے۔ یہ ایک تاریخی امید ہے لیکن اس کے ساتھ ساتھ غیریقینی کی صورتحال بھی غیرمعمولی ہے۔