اسرائیلی حملہ ایرانی خودمختاری کی سنگین خلاف ورزی ہے، او آئی سی

جدہ : اسلامی تعاون تنظیم نے ایرانی تنصیبات کے خلاف اسرائیلی جارحیت کی شدید مذمت کرتے ہوئے اسے ایرانی خودمختاری کی سنگین خلاف ورزی قرار دیا ہے۔ او آئی سی کے اعلامیہ میں کہا گیا ہے کہ اسرائیلی حکومت کے جارحانہ اقدامات بین الاقوامی قوانین اور اقوام متحدہ کے چارٹر کی صریح خلاف ورزی کے ساتھ ساتھ ایران کی خودمختاری اور علاقائی سالمیت کی کھلی خلاف ورزی ہیں۔ او آئی سی نے ایران پر حملے کیلئے عراقی سرزمین کے استعمال اور اس کی خودمختاری اور علاقائی سالمیت کی خلاف ورزی کی بھی شدید مذمت کی اعلامیہ میں کہا گیاہےکہ ایران اور دیگر متاثرہ ممالک بین الاقوامی قانون اور اقوام متحدہ کے چارٹر کے مطابق قبل اپنی خودمختاری، علاقائی سالمیت، سلامتی اور شہریوں کے تحفظ کا موروثی حق محفوظ رکھتے ہیں۔ اوآئی سی نےاس بات کا اعادہ کیا کہ مقبوضہ فلسطینی علاقوں بالخصوص غزہ، لبنان میں جاری اسرائیلی مظالم کے ساتھ ساتھ مغربی ایشیا میں دیگر جگہوں پر اس کی بدنیتی پر مبنی سرگرمیاں علاقائی امن، سلامتی اور استحکام کے لیے خطرہ ہیں۔او آئی سی نے بین الاقوامی امن اور سلامتی کو برقرار رکھنے کیلئے سلامتی کونسل سے فوری اور موثر مداخلت کا مطالبہ کیا۔