Raza Musani 
غزہ : غزہ میں اسرائیلی فوج نے خاتون اور بچے سمیت مزید تین فلسطینیوں کو شہید کردیا جبکہ طوفان بائرن کے باعث شدید بارشوں سے غزہ کی صورتحال انتہائی خراب ہوگئی۔
غزہ کے شمالی علاقے جبالیہ البلاد میں اسرائیلی فوج نے فلسطینیوں کو فائرنگ کا نشانہ بنایا۔ تین شہادتوں سے جنگ بندی معاہدے کے بعد سے شہدا کی تعداد تین سو بیاسی ہوگئی ہے۔ جبکہ نو سو بانوے افراد زخمی ہوئے۔
ادھر سِول ڈیفنس نے اہلی اسپتال کے صحن سے 40 لاشیں نکال کر منتقل کردیں۔ محاصرہ کے دوران مجبوراً شہداء کو اسپتال کے صحن اور اردگرد دفن کرنا پڑا تھا جن کی شناخت کے بعد قبرستان میں تدفین کی جائے گی۔
دوسری جانب طوفان بائرن کے باعث غزہ میں شدید بارشوں سے صورتحال انتہائی خراب ہوگئی۔ خیمے اور پناہ گاہیں ڈوب گئیں۔ بعض علاقوں میں کئی کئی فٹ پانی کھڑا ہوگیا۔ حکام نے خبردار کیا ہے کہ بے گھر ہونے والے لاکھوں افراد کو خطرہ لاحق ہے۔
