اسرائیلی جارحیت جاری، 24 گھنٹوں میں 80 شہید، بھوک سے مزید 10 فلسطینی دم توڑ گئے

غزہ : صیہونی فوج کے غزہ پر جاری حملوں میں چوبیس گھنٹوں کے دوران امداد کے منتظر بائیس افراد سمیت اسی فلسطینی شہید اور کئی زخمی ہوگئے۔
اسرائیلی جنگی طیاروں نے صبح سویرے غزہ سٹی کے رمل محلے میں رہائشی عمارت پر حملہ کیا اور ایک ہی گھر کے چھ افراد شہید اور دیگر کو زخمی کردیا۔ صیہونی فوج نے شجاعیہ محلے کے مختلف علاقوں کو بھی اپنے حملوں کا نشانہ بنایا جس میں سات فلسطینی شہید اور کئی زخمی ہوگئے۔ جبالیہ میں بھی ایک مکان پر ڈرون حملہ کرکے چار افراد کو شہید کردیا گیا۔ رفح اور دیگر علاقوں میں امدادی ہجوم اور امدادی مراکز کی طرف جانیوالے بائیس افراد صیہونی فوجیوں کی گولیوں کاشکار ہوئے۔
جنگ کے آغاز سے اب تک شہدا کی مجموعی تعداد انسٹھ ہزار سات سو تک جاپہنچی ہے۔
اُدھر بھوک سے بھی اموات کا سلسلہ جاری ہے۔ چوبیس گھنٹوں کے دوران پانچ بچوں سمیت مزید دس فلسطینی دم توڑ گئے ۔مرنیوالوں کی مجموعی تعداد ایک سو بائیس ہوگئی ہے جس میں تراسی بچے شامل ہیں۔