اسرائیل راستے کھولے تاکہ امداد کی ترسیل میں اضافہ ہو، اقوام متحدہ

اقوام متحدہ کے ادارے اوچا کے سربراہ ٹام فلیچر نے اسرائیل پر زور دیا ہے کہ وہ فوری طور پر غزہ میں مزید راستے کھولے تاکہ خوراک اور امدادی سامان کی ترسیل میں اضافہ ہو سکے۔ ٹام فلیچر نے میڈیا سے گفتگو میں کہا کہ غزہ کے لیے امدادی سامان کی فراہمی میں اضافہ ضروری ہے۔ انہوں نے خبردار کیا کہ موجودہ صورتحال میں سینکڑوں ریلیف ٹرکوں کو داخل ہونے کی اجازت دی گئی ہے وہ انسانی بحران کو کم کرنے کے لیے نہایت ناکافی ہیں۔
فلیچر نے اس بات پر زوردیا کہ کھلی سرحدیں اور زیادہ رسائی ہی غزہ کے بھوک زدہ اور متاثرہ شہریوں کی زندگیوں کو بچانے میں کلیدی کردار ادا کر سکتی ہیں۔ فلیچر نے کہاکہ سرحدوں پر ایک لاکھ نوے ہزار میٹرک ٹن امدادی سامان منتقلی کے انتظار میں ہے اور ہم اسے پہنچانے کے لیے پرعزم ہیں۔ یہ زندگی بچانے والی خوراک اور غذائی امداد ہے۔