اسرائیل کا مارچ میں غزہ پر بڑے پیمانے پر حملے کا منصوبہ

تل ابیب : اسرائیلی اخبار نے انکشاف کیا ہے کہ اسرائیلی فوج مارچ میں غزہ پر دوبارہ بڑے پیمانے پر حملہ شروع کرنے کا منصوبہ بنا رہی ہے، جس کا مرکزی ہدف غزہ سٹی ہو گا۔ ٹائمز آف اسرائیل کے مطابق اسرائیلی منصوبے کا مقصد نام نہاد یلو لائن کو مغرب کی جانب ساحل تک توسیع دینا۔فلسطینیوں کو زبردستی بے دخل کرنا اور شہر پر قبضہ کرنا ہے۔ رپورٹ کے مطابق اسرائیلی وزیر اعظم بن یامین نیتن یاہو کو دوسرے مرحلے کی کامیابی پر یقین نہیں، اسی لیے فوج کو نئے حملے کی تیاری کا حکم دیا گیا ہے۔ ٹائمز آف اسرائیل نے ایک اسرائیلی عہدیدار اور ایک عرب سفارتکار کے حوالے سے بتایا کہ امریکی حمایت کے بغیر اسرائیلی منصوبہ آگے نہیں بڑھ سکتا، جبکہ واشنگٹن اکتوبر میں ہونے والی نازک جنگ بندی کے دوسرے مرحلے کو بچانے کی کوشش کر رہا ہے۔ مارچ میں مجوزہ حملے کے بعد اسرائیل اس کنٹرول کو مزید بڑھانا چاہتا ہے، جبکہ مشرقی غزہ سٹی کے طفاح، شجاعیہ اور زیتون علاقوں میں ییلو لائن کو پہلے ہی آگے بڑھایا جا رہا ہے۔