Raza Musani 
تہران : ایران کے اسرائیل پر حملوں کی حمایت میں نماز جمعہ کے بعد لاکھوں ایرانی سڑکوں پر نکل آئے اور حکومت اور اپنی فوج سے اظہار یکجہتی کیا گیا۔ ایران کی فضا اسرائیل اور امریکا مردہ باد کے نعروں سے گونجتی رہی۔
عراق۔ لبنان اور یمن سمیت کئی ممالک میں ایران سے یکجہتی کیلئے بڑی بڑی ریلیاں نکالی گئیں۔ دارالحکومت تہران میں ہزاروں افراد نے تہران یونیورسٹی سے آزادی ٹاور تک مارچ کیا۔ شدید گرمی کے باوجود ریلی میں خواتین اور بچوں نے بھی بھرپور حصہ لیا۔ قومی پرچم اور سپریم لیڈر اور شہدا کی تصاویر اٹھائے مظاہرین نے ایران کے اسرائیل پر حملوں کی مکمل حمایت کی اور امریکا و اسرائیل کے خلاف نعرے لگائے۔
مشہد، اصفہان، تبریز، قم، شیراز، قزوین، یزد اور گیلان سمیت چھوٹے بڑے شہروں میں بھی ریلیاں نکالی گئیں اور مظاہرے کئے گئے۔
یمن کے دارالحکومت صنعا میں لاکھوں افراد نے ایران کی حمایت میں مظاہرہ اور مکمل اظہار یکجہتی کیا۔ عراق اور لبنان میں بھی ایران سے اظہار یکجہتی کے لیے زبردست ریلیاں نکالی گئیں۔
