اسرائیل امریکی اسلحہ سے غزہ میں بے گناہوں کا خون بہا رہا ہے، ایرانی صدر

تہران: ایرانی صدر آیت اللہ سید ابراہیم رئیسی نے کہا کہ امریکی اسلحہ اور انٹیلی جنس اطلاعات کی مدد سے اسرائیل غزہ میں فلسطینی بے گناہ عوام کا خون بہا رہا ہے۔عراقی وزیراعظم شیاع السوڈانی کے ہمراہ تہران میں مشترکہ پریس کانفرنس سے خطاب میں ایرانی صدر نےکہاکہ غزہ میں جاری قتل عام اور نسل کشی کا سلسلہ فوری طور پر بند ہونا چاہئے۔ انہوں نے کہا کہ امریکہ ہتھیار اور خفیہ اطلاعات فراہم کرکے صیہونی حکومت کو غزہ میں بے گناہ فلسطینیوں کے قتل عام پر ابھار رہا ہے۔ انہوں نے کہا کہ امریکہ کا جنگ بندی کے لئے کوشش کرنے کا دعوی مکمل جھوٹ ہے۔ حقیقت میں امریکا صیہونی حکومت کو کھلی چھوٹ دے رہا ہے تاکہ انسانیت سوز مظالم جاری رکھ سکے۔ انہوں نے کہاکہ فلسطینیوں کے اچانک اور بھرپور حملے کے بعد اسرائیلی حکومت مکمل ناکام ہوگئی تھی لہذا امریکا اس کو دوبارہ اپنے پاوں پر کھڑی کرنے کی کوشش کررہا ہے۔ انہوں نے امریکا اور یورپی ممالک کے رویے پر تنقید کرتے ہوئے کہا کہ امریکہ اور یورپی ممالک بھی فلسطینیوں کے خلاف جرائم میں اسرائیل کے ساتھ شریک ہیں۔ صدر ابراہیم رئیسی نے مزید کہا کہ ایران علاقائی اور بین الاقوامی سطح پر مسلم ممالک کی جانب سے امریکا اور اسرائیل کو غزہ میں قتل عام سے روکنے کی کوششوں کی حمایت کرتا ہے۔