غزہ میں تباہی و نسل کشی کا مکمل ذمہ دار اسرائیل ہے، عرب اسلامی کمیٹی

جدہ : عرب لیگ اور اسلامی تعاون تنظیم کی غزہ سے متعلق وزارتی کمیٹی نے فلسطینیوں کے خلاف جاری نسل کشی کے جرائم اور تباہی کا ذمہ دار مکمل طور پر اسرائیل کو قرار دیا ہے۔
وزارتی کمیٹی کے مشترکہ بیان میں کہا گیاہے کہ غزہ میں جاری نسل کشی اور انسانی تباہی کی کوئی مثال نہیں ملتی۔ کمیٹی نے عالمی برادری خاص طور پر سلامتی کونسل کے مستقل ارکان پر زور دیا کہ وہ اسرائیل کی غیر قانونی جارحانہ پالیسیوں کو روکنے کےلیے فوری اقدامات کریں۔ کمیٹی نے غزہ میں اسرائیلی جارحیت کے فوری اور مکمل خاتمے، غزہ مغربی کنارے اور مشرقی یروشلم میں شہریوں اور سول انفرا اسٹرکچر کے خلاف قابض افواج کی جاری خلاف ورزیاں بند کرانے پر بھی زور دیا گیا۔ بیان میں کہاگیاہے کہ اسرائیل قابض طاقت کے طور پر غزہ میں خوراک، دواوں اور ایندھن سمیت انسانی امداد کی فوری اور غیر مشروط طور پر داخلے کی اجازت دے۔