Raza Musani 
دمشق: ایرانی وزیر خارجہ عباس عراقچی نے کہا ہے کہ تہران شام اور خطے میں اسرائیلی قبضے کیخلاف مزاحمتی محاذ کی مکمل حمایت جاری رکھے گا۔ ایرانی وزیرخارجہ عباس عراقچی نے دمشق میں شامی صدر سے ملاقات کی۔ انہوں نے کہا کہ اصولی موقف علاقائی امن و استحکام کے تحفظ اور خطے کے ممالک کی قومی سلامتی کی حمایت کے عین مطابق ہے۔ انہوں نے کہاکہ ایران کے جواب نے صیہونی وجود کو یہ سبق دیا کہ مزاحمت کا محور دشمن کو روکنے اور اس کے منصوبوں کو ناکام بنانے کی صلاحیت رکھتا ہے اور یہ کہ وہ اپنے عوام کے عزم اور یکجہتی کی بدولت مضبوط اور ثابت قدم رہے گا۔ شام کے صدر نے مظلوم فلسطینی عوام کی حمایت اور اپنے دفاع کے حق کے ساتھ ساتھ صیہونی دشمن کے قبضے اور جارحیت کے خلاف مزاحمت میں ایران کے مضبوط موقف کو سراہا۔ اسد نے کہا کہ بین الاقوامی برادری کو اسرائیل کی مجرمانہ مہم جوئی کو ختم کرنے کے لیے ہر ممکن کوشش کرنی چاہیے۔
