ایران زیادہ شدید حملے کی تیاری کررہا ہے، امریکی اخبار

واشنگٹن: امریکی جریدے وال اسٹریٹ جرنل نے کہا ہے ایران اسرائیل پر زیادہ سخت اور شدید حملے کی منصوبہ بندی کر رہا ہے۔ وال اسٹریٹ جرنل نے عرب اور ایرانی ذرائع سے دعوی کیا ہے کہ ایران امریکہ کے صدارتی انتخاب کے بعد اسرائیل پر یکم اکتوبر سے زیادہ سخت حملے کی منصوبہ بندی کر رہا ہے، جس میں زیادہ طاقتور وار ہیڈ کے حامل میزائلوں کا استعمال کیا جائے گا۔ امریکی جریدے کے مطابق، کشیدگی کے اس راونڈ میں ایرانی فوج بھی شامل ہو گی۔ اس سے پہلے امریکی و اسرائیلی انٹیلیجنس رپورٹوں میں دعوی کیا گیا کہ ایران نے بیلسٹک میزائل عراق منتقل کیے ہیں اور اسرائیل پر ایران کا ممکنہ حملہ عراقی سرزمین سے ہوگا۔ اسرائیل نے عراق کو سنگین نتائج کی دھمکی دی ہے۔ امریکہ نے ایران سے کہا ہے کہ اسرائیل پر مزید حملے کی صورت امریکہ اسرائیل کو ایران پر بڑا جوابی حملہ کرنے سے نہیں روک پائے گا۔ امریکہ نے بی 52 بمبار طیارے سمیت بلسٹک میزائلوں کو تباہ کرنے کے مزید سسٹم مشرق وسطی منتقل کیے ہیں۔