Raza Musani 
تہران: ایران نے عالمی ایٹمی توانائی ایجنسی (آئی اے ای اے ) کی تکنیکی ٹیم کو دورے کی اجازت دینے پر رضامندی ظاہر کردی۔
ایران کے نائب وزیر خارجہ کاظم غریب آبادی نے نیویارک میں اقوام متحدہ کے اجلاس کے موقع پر گفتگو میں کہا کہ جذبہ خیرسگالی کے تحت آئی اے ای اے کے وفد کو آنے والے ہفتوں کے دوران ایران آنے کی اجازت دی جاسکتی ہے۔
انہوں نےکہا کہ یہ وفد جوہری تنصیبات کا معائنہ کرنے کیلئے نہیں بلکہ تعاون کے لیے نئے فریم ورک پر بات چیت کے لیے ایران آئے گا۔ انہوں نے کہا کہ نئے حالات کے پیش نظر وعدوں کے نفاذ کے لیے ایجنسی کے ساتھ تازہ بات چیت کی ضرورت ہے۔ یہ ایک اہم معاملہ ہے۔ انہوں نے کہاکہ ہمیں امید ہے کہ اس اقدام کا خیر مقدم کیا جائے گا اور وہ اس طرح کے تعاون اور خیر سگالی کی قدر کریں گے۔
