امریکی دھمکیاں نظر انداز، برازیل کا بھی روس سے سستا ایندھن خریدنے کا اعلان

چین، بھارت اور سری لنکا کے بعد ایک اور ملک برازیل نے بھی روس سے سستا ایندھن خریدنے کا اعلان کر دیا۔لاطینی امریکا کے ملک برازیل کے صدر جیربولسونارو کا کہنا ہے کہ ان کا ملک جلد ہی روس سے سستا ڈیزل خریدے گا۔ برازیل روس سے انتہائی سستے ڈیزل خریداری کے معاہدے تک پہنچنے کے قریب ہے اور امکانات یہی ہیں کہ ضروریات کو پورا کرنے کے لیے ماسکو سے ڈیزل خریدا جائے گا جو کہ زیادہ مناسب قیمت پر ہے۔اس سلسلے میں روس کے صدر اور برازیلی صدر کے درمیان ٹیلیفونک بات چیت بھی ہوئی ہے جس میں صدر پیوٹن نے جنوبی امریکی ملک کو کھادوں کی مسلسل فراہم کے عزم کا اظہار کیا ہے۔برازیل ایک وسیع زرعی ملک ہے جسے سستی کھاد اور ڈیزل کی اشدضرورت ہے اس صورتحال کو مدِنظر رکھتے ہوئے برازیلی صدر نے ایندھن کی سستی خریداری کے لیے جن تجاویز پر غور کیا ہے اس میں ایک روس سے سستے ڈیزل کی خریداری سب سے اہم ہے۔