غزہ میں جنگ بند نہ ہوئی تو خطے کے حالات قابو سے باہر ہو جائیں گے، ایران

تہران: ایرانی وزیر خارجہ حسین امیر عبداللہیان نے اسرائیل کو خبردار کیا ہے کہ غزہ میں جنگ بند نہ کی تو مشرق وسطیٰ کے حالات قابو سے باہر ہوجائیں گے۔ تہران میں جنوبی افریقی ہم منصب نالیدی پنڈور کے ہمراہ نیوز کانفرنس کے دوران ایرانی وزیرخارجہ نے خبردار کیا کہ اسرائیل نے غزہ میں نسل کشی اور انسانیت کیخلاف جرم بند نہ کئے تو کچھ بھی ہوسکتا ہے۔ صورتحال سے نہ صرف حملہ آور بلکہ جنگ کے حامی بھی متاثر ہوں گے۔ انہوں نے کہا اسرائیلی جنگی جرائم میں امریکا بھی قصور وار ہے۔ انہوں نے کہا کہ خطہ اب بارود کے ڈھیر پر ہے۔ غزہ میں کسی قسم کی غلط فہمی، نسل کشی اور لوگوں کی زبردستی نقل مکانی کے نتائج خطے اور مزاحمت کاروں دونوں کے لیے یکساں ہو سکتے ہیں۔