امریکی فوج شام سے نکل جائے دہشت گردی ختم ہو جائے گی، روس

نیویارک : روس نے شام میں دہشت گردی کی وجہ امریکی فورسز کو قرار دیتے ہوئے واضح کیا ہے کہ اگر امریکا شام سے اپنی فوجیں نکال لے تو دہشت گردوں کا تیزی سے صفایا کیا جائے گا۔ اقوام متحدہ میں روس کے مستقل مندوب نے سلامتی کونسل کے اجلاس سے خطاب میں کہا کہ شام میں بین الاقوامی دہشت گردی کے باقی ماندہ نیٹ ورکس کو مکمل طور پر ختم کرنا اور شام میں داعش اور دیگر گروہوں کی موجودگی کو ختم کرنا ضروری ہے۔ انہوں نے مزید کہا کہ شام کی سرزمین سے امریکی قابض افواج کے انخلاء کا مطلب اس انتہائی مصیبت زدہ ملک میں دہشت گردوں کی موجودگی اور پڑوسی ریاستوں میں دہشت گرد نیٹ ورک کا فوری اور ناگزیر خاتمہ ہوگا۔ روسی مندوب نے کہا کہ دہشت گرد گروہ ان علاقوں میں پناہ گزیں ہیں جن پر شامی حکومت کا کنٹرول نہیں ہے۔ 4 اگست کو شام میں گشتی مشن کے دوران، روس کی فضائی ٹاسک فورس نے امریکی حمایت یافتہ دہشت گردوں کے ایک گروپ کو ختم کر دیا، کیونکہ وہ ملک کے صحرائے البدیہ میں پناہ گاہوں میں چھپے ہوئے تھے۔ نام نہاد شہداء القریتین بریگیڈ جنوب مشرقی شام میں اسٹریٹجک التنف کے علاقے میں تعینات تھی، جس پر امریکی فوجیوں کا کنٹرول ہے۔ اس تنظیم نے بدیا کے علاقے میں شہریوں کے خلاف دہشت گردی کی ہلاکتوں کا ارتکاب کیا۔ انہوں نے کہا کہ شام سے امریکی فوجیوں کے انخلاء سے وہاں کے باقی ماندہ دہشت گردوں کے خاتمے میں مدد ملے گی۔